طياح الضبابة

قُولُولْ لَّبْحُورْ الِّي عَرْفَاتْنِي

الِّي مَااا قْدْرَاتْ أُوْ غَرّْقَاتْنِي

قُولُو لَخْوَاااتِي الِّي فَرّْقَاتْنِي

قُولُو لدَّنْيَا الِّي خَلَّاتْنِي

قُولُو لْبَابَا .....ادْشرْنَا ارْجَعْ غَابَا

وَاشْ ايفِييدْ انّْجَمْ فْطْيَاحْ الضْبَابَا؟

الذْرَاعْ امْسَنَّدْ الْحِيطْ أُوْ يَسْعَى فْطَابَاا

اعْقَلْتِي بِلِّي كنَّااا طَلَّابَا

شْكُونْ اعْقَلْ عْلِيكْ وْلَّا عْلِيَّا؟

كُنَّا نْوَقْفُو قَدَّامْ الْمَحْلَابَا

وْ نْهَضْرُو غِييرْ بشْوِيَّا

كَانْتْ اعْيُونِي فْوَجْهِي وَااحْلِينْ

وْالصِّينِيَّا مَنْ تَحْتهَا الرِّجْلِينْ

كْنْتْ نْوْقَفْ قَدَّامْ السِّينِيمَا

أُو شْكُونْ إِكَمَّلْ لِيَّااا ندْخَلْ؟

كَنْتْ انْظُنّْ الْخِيْلْ عَنْدُو الْقِيمَا

حَتَّى شفْتُو فَلْبَرْكَاصادْخَلْ

كَنْتْ انْظُنّْ الْبَازْ اجْنَاحُو قْوِيمَا

حَتَّى شفْتُو طَاحْ عْلَانّْخَلْ

شْحَاالْ نَعَّتْ الدّْنْيَا كْرِيمَا

اقْبَلْ مَا اتَّبْلَى بْلَبْخَلْ

الْحُوتَا لِّي فْلْمَرْسَى لْقْدِيمَا

مْصِيرْهَا اشْلَاظا وَالْخَلْ

اعْقَلْتِي بِلِّي بَعْنَا لَقْرَاعِي

امْشَاتْ إيَّامْنَا فْجْمِيعْ التُّوتِيَّا

اطْغَمْقَاتْ شْحَالْ دْلَمْرَاعِي

أُوْمُولْ الصَّانْكْ امْگَابِلْ اجُّوطِيَّا

قولُولْ لَّبْحُورْ... اللّي غَرّْقَاتْنِي...

قولُولْ ادّْنْيَا... اللّي خَلَّاتْنِي...

قولُولْ لَّبْحُورْ... اللّي عَرْفَاتْنِي...