دەرگەکەت بکەوە

شەو ڕاشکا

ئەژنۆم شل بو

مانگ بە تاقی ئاسمانەوە هەڵپڕووکا

دەرگەکەتم لێ بکەوە

ئەم شەو هاتووم

بۆ چنینی چەپکە نێرگزێکی چاووت

بۆ نووچ دانێ، بۆ خەونێ ، تۆزە گریانێ

لەسەر هەوری قژی خاووت

لەسەر هەوری قژی خاووت

ئەمشەو هاتووم

تروسکەی شاری یادگاری بانگی کردووم

لەگەڵ سیمای مناڵیما

لەگەڵ خەمی شۆڕەبیما

هاتووم ناگەڕێمەوە

یا پێت دەگەم

یا وەک مۆمێک دەسووتێم و دەتوێمەوە

دەرگەکەتم لێ بکەوە

هەردڵدارەکەی جارانم

هەر کێڵگەکەی بەر دەرگەتم

هەر تینوەکەی کڕێوە و لێزمەی بارانم

دەرگەکەتم لێ بکەوە

من ئەوکەسەم تا دوێنێ بو

لەناو گەرووی ڕووناکیدا دەتشاردمەوە

لەناو جامی مەترسیدا دەتخواردمەوە

کات لەژێر باڵی ئاسماندا

خەریکە باوێشک ئەیات

شوێن قولەڕەشێکی کپە

دەرگەکەتم لێ بکەوە

شتێک نیە شیرینتربێ

لەخشپەی پێ و چرپەچپ

دەرگەکەتم لێ بکەوە

کفت و ماندووی ڕێگەی دوورم

وەکوو جاران

کەمێک لات ئەمێنمەوە و ڕادەبووم

شەو ڕاشکا

ئەژنۆم شل بوو

مانگ بەتاقی ئاسمانەوە هەڵپڕووکا

دەرگەکەتم لێ بکەوە

دار و بەردی بەردەرگەتان هاتنە تکا

دە بیکەرەوە